អាមេរិកខាងត្បូង៖ ក្រុមជម្រើសជាតិសាំបាប្រេស៊ីល បានបន្តកំណត់ត្រាឈ្នះទាំង ៧ប្រកួត ក្នុងវគ្គជម្រុះ FIFA World Cup តំបន់អាមេរិកខាងត្បូងយប់មិញ ក្រោយជ័យជម្នះយ៉ាងតានតឹងក្នុងកីឡដ្ឋាន Monumental ស្ថិតនៅរដ្ឋធានី Santigao ប្រទេសឈីលីនាព្រឹកថ្ងៃសុក្រសប្តាហ៍នេះ។ 

ខ្សែប្រយុទ្ធស្លាបវ័យ ៣២ឆ្នាំ Éverton Ribeiro គឺជាតួឯកក្នុងការប្រកួតនេះសម្រាប់ប្រេស៊ីល ក្រោយប្តូរចូលជំនួសក្នុងវគ្គទី២ និងរកគ្រាប់បញ្ចូលទីមួយគ្រាប់គត់ ជួយឱ្យប្រេស៊ីល ឈ្នះឈីលី ទទួលបាន ៣ពិន្ទុ និងមាន ២១ពិន្ទុពេញ ដាច់ក្រុមលេខ ២ អាហ្សង់ទីន ៦ពិន្ទុ។

លទ្ធផលគួរឱ្យចាប់អារម្មណ៍ផ្សេងទៀតសម្រាប់ការប្រកួតព្រឹកមិញនេះ រួមមានក្រុមជើងឯក Copa America ២០២១ អាហ្សង់ទីន រកបាន ៣ពិន្ទុក្នុងជ័យជម្នះ ៣-១ នាទឹកដីវេណេហ្ស៊ូអេឡា ដោយគ្រាប់បាល់ខ្សែប្រយុទ្ធ Inter Milan ទាំងអស់រួមមាន Lautaro Martinez ១គ្រាប់ និង២គ្រាប់ទៀតដោយកីឡាករ Joaquín Correa។ ដោយឡែក គូផ្សេងៗរួមមាន បូលីវៀ ១-១ កូឡុំប៊ី, អេក្វាដ័រ ២-០ ប៉ារ៉ាហ្គាយ និងប៉េរូ ១-១ អ៊ុយរ៉ូហ្គាយ។

ប្រកួតបន្ទាប់នឹងធ្វើឡើងនៅទាបភ្លឺ និងព្រឹកថ្ងៃទី០៦ ខែកញ្ញានេះរួមមាន៖ ប្រេស៊ីល ទទួលអាហ្សង់ទីន, អេក្វាដ័រ ជួបឈីលី, ប៉ារ៉ាហ្គាយ ស្វាគមន៍កូឡុំប៊ី, បូលីវៀ ធ្វើដំណើរទៅទឹកដី អ៊ុយរូហ្គាយ និងចុងក្រោយ ប៉េរូ ទទួលភ្ញៀវវេណេហ្ស៊ូអេឡា៕